狗的品種多不勝數，一般香港人養的狗種大多跟着潮流而改變。一套“101斑點狗”嘅電影，令呢種狗突然成為飼養的大熱之選；一套“導盲犬小Q”又令拉布拉多犬成為大熱；一套“極地雪犬”又令夏天天氣酷熱的香港充斥着本應生長在寒冷雪地的雪撬狗。早前街滿是像啤啤熊般的玩具貴婦狗，近排好似又興養積羅素犬。但數來數去，唐狗永遠不入流，亦唔會係養狗人士嘅首選。

唐狗，即混種狗，其實由古至今一真都係中國老伯性飼養嘅家犬，仲係食用犬添，常言“狗肉滾一滾，神仙都企唔穩”，直至現在國內很多地區都仲有人當狗肉係佳餚。

唐狗的繁殖及生命力都很強，俗語講句即係很粗生，佢哋屬於群體嘅動物，常聯群結黨咁活動，佢哋嘅外型多元化，毛色亦各有不同，但在香港呢個地方，卻有着同一命運，就係被人厭棄，甚至虐待。以前我都同大家一樣，對唐狗嘅印象，都係從別人口中得知，例如聯群出沒的流浪狗大多兇惡無比，有些仲會咬人添。我甚至試過返大陸探親，親歷觸目驚心的劏狗場面，令當時年幼的我留下深刻的印象。

早前，收到狗會嘅電郵，話有人宣稱有一群幼小的拉布拉多BB待人領養，引起不少人關注，但說穿了，原來這些外表和毛色像極拉布拉多犬的狗狗，只是普通的唐狗BB。可能那人並非刻意瞞騙大家，但這亦反映了一個事實，若人們知道那些只是唐狗BB，誰又會著緊為牠們找個家呢？又會不會有那麼多人有興趣要領養呢？無論如何，有人要領養牠們是一件好事，只希望當這些狗主，在狗狗漸漸長大，耳朵豎起來，逐漸呈現唐狗的型態時，不會因此而遺棄牠們。希望這些狗主在飼養牠們的過程中，發覺唐狗都是很可愛的，與牠們建立感情後，不會只因牠們的品種而捨棄吧！

另外，我想喺度將我接觸唐狗的一點經歷同大家分享，我從未正式養過狗，只記得十多歲時，母親曾從親戚那裡把一隻唐狗B帶回家，可能狗BB離開狗媽媽，深夜哭叫不停，為免吵着明天要上班的父親，我在整晚坐在廚房的地上，抱着唐狗B安撫著牠，這樣牠才安睡到天明，而我就無覺好瞓，第二天媽媽便趕快把狗送回了，而這也是我唯一的養狗經驗。近年我都認識了一些有養狗的朋友，但他們養的大多是有品種的狗狗，令我可以接觸唐狗的機會簡直絕無僅有，淨係知母親成日同我講喺街見到d流浪狗要遠遠躲開，唔好惹佢哋。直至上年過年，有朋友帶了一隻黑色唐狗B與我們見面，隻B喱喺個斜孭袋度，好鬼cutie，我試吓抱佢，佢不停兩隻手向上爬，一放落地先尿尿，好鬼死乖，從那天起我簡直對佢着迷，朋友叫佢做kingkong，但我就死都要叫佢做唐唐，因為佢喺唐狗。唐唐兩個月間很快便變成小狗，成日咬住人褲腳要人同佢玩，活潑到不得了，我得閒無事就去同佢玩，後來因為朋友住公屋不可再養狗，而狗狗又漸漸長大，最後搵到個船家收養佢，就係咁，佢就變成“King of the Boat”啦！聽說而家仲生活得自由自在，好開心添！

及至我去狗房做義工，第一次帶出街嘅又係唐狗，仲一樣係黑色嘅，只有幾個月大，我初時都怕應付唔來，但係出到街，佢又好合作咁跟住呢個陌生人行，去到公園外嘅長椅，我同佢講話要坐低休息吓，佢又好乖咁伏喺椅吓無亂走，服從性非常之高。其實喺狗房入面嘅唐狗，雖然很多都大大隻，見到好似好得人驚，但係佢哋有D真係膽小如鼠，有D又貪玩到死，有D又嗲到你暈，綜合一點，集所有狗狗嘅優點於一身，而且較少被疾病纏身，唔使特別花時間去照顧，佢哋絕對值得有一個愛錫佢哋嘅主人，可惜很多唐狗都已經待在狗房好一段日子，等待再等待，我常常在想，以佢哋嘅優點，無理由找唔到一個家，後來我知道原因了，雖然佢哋優點多多，但卻有一樣致命的缺點，就係佢哋生來便是一隻不大受香港人歡迎的「唐狗」。唉！人們崇洋愛番狗嘅觀念唔知幾時先會改變呢！